TRAVERSAR LA CARRIÈRA

 

Cresiáu qu’aquelas mòtas que florisson dins las carrièras - e quitament dins lo campèstre, - pintradas de blanc e senhaladas d’un panèl de limitacion de la velocitat a 30 qm/h, que vos fan sautar a vos far tocar lo cuol per tèrra, èran per obligar los enjaurits a alentir.

Plan segur, aqueles alentissors, passatges subre-nauçats, gendarmas colcats, servisson a’n aquò, mas comprenguèri la siá autra utilitat fa pas gaire de temps.

Quand ausiguèri que per trapar de trabalh, sufisiá pas que de traversar la carrièra, comprenguèri que los passatges subre-nauçats èran aquí per ajudar los caumaires. Per los ajudar a trapar un emplèc, es evident, los cal ajudar a traversar la carrièra. Los caumaires que son del costat impar de la carrièra, sabon que lo trabalh lo traparàn del costat par, mas los que son del costat par, sabon, eles, que lo traparàn del costat impar. Los dus devon traversar, e, dins la siá quista, forçadament se crosaràn al mièg de la carrièra, çò que pòt entrainar trebolaments. Cal doncas, per se los estalviar, multiplicar aqueles gas d’una riba a l’autra de la carrièra. Bastir un passatge subre-nauçat es vertadièrament un mejan de luchar contra la fractura sociala, per caminar cap al plen-emplèc, lo mai important estant de butar los caumaires a se prendre en carga, a los tirar de l’assistanat, a los responsabilizar, en un mot a los far traversar la carrièra.

En mai, se en traversant se fan espotir, aquò tanben contribuirà a l’objectiu de redusir lo percentatge del caumatge.

Bernat Bergé

Archives :

desreglament climatic
Actualitat d'estiu
la rampa del supermercat
tomata matinala
lo pan del mes d'agost