En Òc sioplèt!





tornar als archius

La rampa del supermercat

Me veniá dreit dessús en davalant la rampa del supèrmercat. Me calguèt sarrar contra la paret per pas que m’escampèsse. Se menava lo carriolet d’una man e de l’autra toquetejava lo telefonet, los uelhs clavats sul fenestron. Dins lo carriolet, al mièg de las crompas, sietat a la revèrs sul sièti dels nenets, los genolhs que li tocavan la barba, un dròlle, puslèu drollàs que drollet, que plan segur sabiá caminar de las doas cambas dempuèi longtemps, mas que se daisssava menar coma los reis fenhants d’un còp èra, e que toquetejava el tanben lo telefonet, los uèlhs clavats sul fenestron.

Tè, me diguèri, una maire que mena lo siu dròlle a las crompas per melhor l’aluserpir, li aprene a comptar, a destriar las crompas, a pas se daissar anar a l’enlusernament de la reclama, a se malfisar de las farlabicas, a far la siá educacion de ciutadan responsable e respectuós de la natura, e tanben partejar un momenton de comunion e de tendresa … E en plaça de comunicar per la paraula, per s’estalviar lo tòrticòli de se virar, per se cansar pas la votz, comunican per S.M.S.

Quand m’aguèron crosat, me virèri e seguiguèri dels uelhs l’equipatge que se’n anava cap al pargue de las veituras, totjorn acapriciats cadun sul siu telefonet.

La femna dobrirà lo còfre de la siá e sens s’arrestar de toquetejar, de l’autra man, i descargarà lo carriolet. Lo dròlle contunharà de toquetejar sens s’avisar que lo carriolet se vuida.

Quand la femna aurà acabat de cargar las crompas, s’avisarà que dins lo carriolet i demòra un parelh de solièrs e que dins aqueles solièrs i a los pès d’un dròlle, e en levant los uelh sus el s’avisarà qu’aquel dròlle es pas lo siu.

Comprendrà qu’endacòm, a l’azard d’una seccion, s’es enganada e a agafat un carriolet qu’èra pas lo siu.