Triste tropic

Deu començar lèu, se la contestacion ganha pas, la realizacion del projècte «Tropicalià». Es la bastison, dins lo Pas de Calais, sus un terrenc de 10 ha, de la mai bèla sèrra tropicala del monde, una copòla de 2 ha e de 32 m de naut. La temperatura i serà de 26 a 28 grases tota l’annada, e mercés a una tecnologia innovanta, la sèrra serà autonòma, la calor reciclada estant estocada e tornada utilizar, e quitament partejada ambe una clinica e un espital vesins. « Una pòrta dubèrta cap a la compreneson d’un ecosistèma freule, » çò dison los iniciators. Los 500 000 visitors per an previstes, i poiràn remirar parpalhòls exotics, peisses, reptils, colibrís e autres aucèls d’Amazonia, e plantas d’un trocet de selva tropicala.

Los elegits sedusits pel projècte, i veson un motor al desvelopament de la region, torisme, emplecs, e un exemple de seguir per la bastison d’autras sèrras sens l’utilizacion de l’energia fossila.

Los opausants, eles, avançan que los terrencs artificializats poirián servir a d’activitats mai essencialas e portairas de mai d’emplecs, coma l’ortalissa, e que la biodiversitat se defend a l’endreit que s’i tròba e non pas dins de reconstitucions jos de campanas de veire.

Ajustarem qu’aquela sèrra poiriá servir, en periòde d’urgéncia, a aculhir los sens abrics que dormisson dins la fred, e los que, en precaritat energetica, se pòdon pas calfar. La sèrra poiriá tanben servir a l’acuèlh dels migrants, sustot als que venon dels tropics e que jos la copòla serián mens despaïsats.

De mai, Tropicalià poiriá balhar enveja d’anar jos los tropics per de bon. E lo grand torisme seriá un biais d’ajudar, a l’encòp, los païses tropicals a se desvelopar e l’aviacion a se sortir de la crisi.
Brèu, ambe Tropicalià, tornariam trapar mai aviat lo monde d’abans.

tornar a la lista