En Òc sioplèt!



audio prochainement disponible

Cossi legir l'occitan?
Comment lire l'occitan ?

Se ganhar lo salut

Un còp èra, del temps de la bastison de las catedralas, per se ganhar lo Salut, remendar lo mal que ne sèm responsables, la Glèisa nos ordenava de pregar, de nos mortificar, e de far pelegrinatges luenchencs. Aquelas peniténcias podián èsser remplaçadas per una contra-partida financièra : se crompar una Indulgéncia.

Aital en 1506, lo Papa Julí II puèi lo seguent, Leon X convidèt los fisèls a se crompar indulgéncias que l’argent se’n aniriá a la bastison de la basilica Sant Pèire. «Tanlèu que la moneda tinda dins la caissa, l’arma se pren la volada del Purgatòri, çò disián.»

Sabi ben qu’aquò se passava a l’epòca de Casimodò e d’Esmeralda, e que uèi, en França, sèm ciutadans d’una Republica laïca, que la Glèisa i es desseparada de l’Estat e que son pas mai los Papas que decidisson e que menan la bastison o la rebastison de las catedralas. De mai, fòrça monde se trufan del purgatòri, de l’infèrn e dels sants del paradís. Las règlas de morala, la consciéncia del Ben e del Mal an abandonat los confessionals e l’encens dels santuaris romanics o gotics, e l’autar de Sant Pèire a daissat la plaça al dels Mediàs. Lo paradís a se ganhar es lo de l’opinion, dels instituts de sondatge, dels burèus de vòte e de las associacions de consomators e d’usatgièrs. Aital, per se ganhar lo paradís, valent a dire un bon imatge, la simpatia del pòble, se tornar crompar una bona consciéncia, sufís de balhar un punhat o melhor una sacada d’euròs, per una causa decretada NACIONALA. E mai la saca serà bèla mai seretz adorats, admirats, decorats, reconeguts coma benfaitors de l’umanitat, e las pecadilhas que vos pesan sus la consciénçia, la planeta estrocerada, un plan social un bocinèl reguèrgue, un concurrent escanat, un compte bancari amagat a l’estrangièr, totas las vòstras ofensas vos seràn perdonadas.

tornar a la lista retour