Secotidas telluricas en tèrra de Renaissença

A la debuta de Mai un tèrratremol a secutat Florença. Las brandidas foguèron febles, mas sentidas dincas al dintre dels musèus, e dins lo brèç de la Renaissença, las autoritats se carcinan per las òbras d’art.

«Podem pas preveire los terratremols, coma ac sabètz, çò diguèt un geofisician. Una sequéncia coma aquela de magnitud moderada nos deu menar a enauçar lo nivèl de la nòstra atencion. Mas cal saber que i a plan pauc de cases de febles tremolaments de tèrra seguits d’una brandida importanta. Lo de l’Aquila (2009) es una excepcion».

Çaquelà la Comuna a botat a jorn los plans d’aparament civils ; Dins la galariá dels Oficis que los toristas s’i premsan per remirar lo Dàvid de Miquèl Angèl una responsabla declarèt : « se i deviá aver un tremolum que faguèsse tombar lo Dàvid (5670 kg) auriam pas mai de pensaments a Florença ! Pr’aquò nos ensonham de totas las òbras d’art e avèm fait de trabalhs d’assolidament de l’estructura del musèu. »

França coneis uèi una nòva «Renaissença», nom novèl del partit presidencial. Aquela «Renaissénça» coneis ela tanben qualques brandidas, benlèu pas tròp fòrtas, mas sufisentas per que d’unes se demanden se son pas l’anóncia d’autras, mai seriosas, capablas de descanilhar los nòstres Dàvid. E totes de se botar a afortir los punts febles de las estructuras.

tornar a la lista