las annadas de publicacion seguissonlo ritme escolari de setembre a setembre Annada 2023Annada 2022Annada 2021Annada 2020Annada 2019
Cossi legir l'occitan?
Comment lire l'occitan ?
A l'attention de ceux qui auraient envie d'apprendre a lire l'occitan correctement, je conseille de suivre la petite méthode d'Andrieu Lagarde que vous trouverez ici : http://lo-luquet-occitan.fr/?legir
En aqueste dintrada, aprèp las calorassas, la secada d’aqueste estiu, s’ausís parlar pas que desrèglament climatic. E totes de bramar, que cal sensibilizar e responsabilizar lo ciutadan, valent a dire lo culpabilizar e lo menar a se cambiar lo compòrtament per salvar la planeta.
Unes dels problèmas environamentals màgers es lo de l’aiga. Gaireben tot lo nòstre territòri manca d’aiga e quaranta e un departaments son en situacion de crisi...
Las consignas son doncas a estalviar l’aiga. E dins los ostalses, un dels degalhs màgers venent de las caças d’aigas, se parla quitament de multiplicar l’usatge de teletas secas.
Lo Guston, per un còp se trapava sus l’autopista dins la veitura del nebot que los carrejava, la femna e el a un repais de familha.
D’un còp la femna aguèt enveja d’escampar d’aiga. Lo nebot s’arrestèt doncas al primièr airal de repaus que se presentèt. Mentre que la femna s’anava engabiar dins los sanitaris, lo Guston, el, tirèt cap al canton d’una sèga per s’i poder escampar. Aital, se pensava en se desbraguetant, estalviarai l’aiga de la caça e farai una pissada ecologica !
Aguèt pas léser d’acabar qu’ausiguèt una votz que bramava :
- Ep, ailà, qué fasètz, monsur ?
Se revirèt en se tornant braguetar e vegèt una veitura de patrolha que n’èran davalats dus gendarmas que bracejavan.
- Podiatz pas anar dins los sanitaris coma un èsser civilizat ?
Lo Guston ensagèt plan de lo sortir lo catequisme del moment, res i faguèt pas : delicte de miccion, çò diguèron, e un verbal de oitanta-cinc euròs.
Miccion, un mot que lo Guston coneissiá pas. Mas miccion, pisson o pissarada dins la natura, oitanta-cinc euròs, aquò passava l’òsca ! E la lenga li prusiá, al Guston, mas s’estimèt melhor de pas lor demandar se l’argent se’n aniriá a la transicion ecologica.