En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2020
Annada 2019

Audio


Cossi legir l'occitan?
Comment lire l'occitan ?

Òsses a rosigar

Un còp èra, se disiá dels paures que los demoravan pas que los òsses a rosigar e pels mai desprovesits qu’avián quitament pas un òs a rosigar. Mas ara sabèm, coma ac remarquèt un president, que los paures an pas de dents, e doncas, que quitament se lor balham d’òsses, son pas en capacitat de los rosigar.

Los filantròps de l’industria agrò-alimentari an doncas pensat de rasclar las ossamentas de buòu per ne recuperar e atalhonar nèrvis, graissa e muscles. Coma lo nom de rascladís es pas tròp apetissadís an causit d’apelar «menièra de buòu» aquela matièra que servís a la fabricacion de bistèc atalhonat.

Mas aqueles benfaitors, per encara mai redusir lo còst d’aquel pastís e lo botar per de bon a la portada de totes, an remplaçat lo rascladís per un abarrejadís de sojà, d’amidon, de pèl e de graissa ; fasèm aital quand volèm apasturar lo canh ambe las cruscas que demòran a la fin del repais, que n’i a pas pron, e que per completar i ajulham un punhat de pastas o de ris.

Aital, an pogut vendre a las associacions caritativas mila cinc cents tonas d’aquel bardís pagadas sul compte dels Fons europencs d’ajuda als mai desprovesits.

Al Canadà, se m’engani pas, per melhor fa préner consciéncia a un delinquent de la gravitat de la siá fauta e l’ajudar a se corregir acompanhan la pena de preson de la projeccion mai d’un còp per jorn per exemple del film Bambi per un braconièr, o d’un documentari de monde estroçats sus la rota per un marrit conductor.

Se trapan los responsables d’aquela frauda alimentària e se son condemnats a la preson, seriá una idèia de los noirir pendent la detencion d’aquela falsa carnalha. Mas dins las nòstras presons, los castigs corporals, los marrits tractaments e encara mai los empoisonaments son contraris als principis e a las valors de la nòstra Republica.

tornar a la lista retour