En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2022
Annada 2021
Annada 2020
Annada 2019

Audio


Cossi legir l'occitan?
Comment lire l'occitan ?

Narcís al supermercat

Un article del «Corrièr Internacional» rapòrta que, dempuèi 2018, China utiliza una nòva fòrma de pagament per reconeissença faciala e ja pèças e bilhetas e quitament còdes QR son a venir tresanats dins d’unes endreits.

Dins cadenas de restaurants, de fornials, de supermercats, sufís a l’utilizator, per pagar, de quichar sus un boton; la siá cara que apareis sus un monitor, es analisada en doas segondas, e li demòra pas que de la confirmar ambe lo numerò del telefonet. E melhor, dins de mètros, quand lo passatgièr se sarra, la siá cara apareis sus la tela, e lo portanèl se dubrís tot solet.

Per utilizar aquel mòde de pagament, sufís de ligar la fotò de la siá cara al siu pòrta-moneda virtual : la camerà analisa los punts nodals, uèlhs, front, barba, caps de maissas, e aquela signatura es comparada a la de la fotò enregistrada.

Gès de marge d’error, una granda securitat : una cara se pòt pas panar ni se pèrdre, quitament se vos perdètz lo cap, res a portar, res a far per pagar : la reconeissença faciala a tot per sedusir. Çaquelà, dins un país que las cameràs de reconeissença facialas mancan pas per trobar «criminals», susvelhar intradas de campús, e quitament empachar de panar lo papièr igienic, d’unes crentan qu’aquela tecnologia siá utilizada per l’Estat «pels sius besonhs de susvelhança, de contraròtle o encara pel seguit dels dissidents», coma s’alarma Adam Ni, cercaire a l’universitat de Sidney. Mas l’empacha màger a l’utilizacion d’aquela tecnologia vendriá d’endacòm mai : dins un sondatge 60% de las personas interrogadas refusarián aquel mòde de pagament, motivadas per una autra rason : se tròban la cara laida sus las telas.

Que sián rassegurats : la firma de pagament mobil ALIPAY es a equipar las cameràs d’un filtre d’embeliment.

tornar a la lista retour