En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2023
Annada 2022
Annada 2021
Annada 2020
Annada 2019

Audio


Cossi legir l'occitan?
Comment lire l'occitan ?

A l'attention de ceux qui auraient envie d'apprendre a lire l'occitan correctement, je conseille de suivre la petite méthode d'Andrieu Lagarde que vous trouverez ici : http://lo-luquet-occitan.fr/?legir



Los Aliscamps en jaune

Fins a la debuta de las vacanças, èra pas aisit de se passejar suls Aliscamps, «la mai polida avenguda del monde», sustot s’èretz vestits de jaune e en companhiá. De creire que la color de la jòia, de la fèsta, de la poténcia, de la coneissença aviá pas mai la plaça sus aquela avenguda. Las fòrças de polícia, de gendarmariá, ambe l’ajuda de l’armada èran mobilizadas cada dimenjada per ne proïbir l’intrada, e lo monde vestits de jaune, tanlèu que puntejavan lo nas èran còp sec butassats, alunhats o arrestats e botats en gàbia. De creire que lo jaune se tornava mudar en la color maldicha de la traitesa, de la messorga, de l’engana, de la malautiá.

Mas lo dimenge 7 de julhet dus cent dètz e uèit ciclistas se roncèron sus las rotas de França, cadun dins l’espèr de poder dintrar sus l’avenguda vestit de jaune.

Pendent tres setmanas tot lo país somièt de jaune, esperèt lo jaune, desirèt lo jaune, e, a broa de las rotas que seguissiá la corsa, lo jaune floriguèt. Drapèus, lençòls, casquetas, camisetas, lo jaune èra sus totas las esquinas, los caps, dins totes los còrs, dins totas las bocas que bramavan lo nom dels favorits e cadun i anava de la siá pregària : «baste qu’un Francés siague en jaune suls Aliscamps!»

E lo dimenge 28 de julhet lo cent cinquantenat de correires que demoravan dins la corsa dintrèron suls Aliscamps. Las fòrças de polícia, de gendarmariá èran aquí per aculhir lo correire jaune e los sius companhs; los que abans s’amagavan, que se barravan darrièrs los ridèus metallics e los contravents, èran sortits per aclamar lo jaune e li far una randissa d’onor e rai se lo jaune èra pas francés !

Me diguèri alavetz que benlèu amont naut fasián pas una allergia a la color mas puslèu al vestit : una camiseta jauna, aquò passava, mas lo gilet non!

tornar a la lista retour