En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2022
Annada 2021
Annada 2020
Annada 2019

audio indisponible

En causa de la crisi sanitari de la Covid 19
fòrça enregistraments existisson pas.

Cossi legir l'occitan?
Comment lire l'occitan ?

Lo pensament de Josèp, en tres nadalets

Tot just l’Enfanton se veniá d’endromir quand se presentèron en primièr, a l’intrada de l’estable, los pastres de l’encontrada en cantant:

Cantem coma cal
Cantem totes amassa
Cantem coma cal
Cantem Nadal!
(Èran anats) sus la montanha
Atrapar un aucelet;
(Lo tenián) per la cambeta
Per amusar l’Enfantet.(1)

Pensatz se l’Enfanton aviá enveja de dromir!
E foguèt pièger quand :

(Ausiguèron) las aubadas
Que se (venián) de sonar
Sus de trompetas dauradas
Dison qu’un Dalfin serà.
L’una fa tararà tararà tararèra
Lintampon laderitampon
Novèl vengut pichon popon.
(Dintrèron) dins l’estable
I (tirèron) lo capèl
(E i tornèron:) Tararà tararà tararèra...
(E de cridar:)
Sonatz pifres e trompetas
Timbalas e caramèls
E vos claras campanetas
Ambe lo còr dels angèls
Digatz-i:
Tararà tararà tararèra...(2)

Un tarrabastal de pas creire dins aquel estable! Pensatz se l’Enfanton podiá dormir, e la siá maire qu’ela tanben n’aviá besonh! Quand aqueles foguèron partits, n’arribèron d’autres, que semblavan mai rasonables:

Chut, chut, chut, chut,
L’enfant dròm, ne hasèm pas de brut! (çò disián.)
(Mas) Un monge escarabilhat
Vòu cantar lo magnificat.
Pendent que bastís la nòta
Josèp (que n’a un sadol) i pren la calòta, (e li far:)
Chut, chut, chut, chut...
(E vaquí que se presenta la Catarina, una desca a la man.)
- Qué li pòrtas, tu, Catin?
- Un grand bocin de bodin
Damb un talhon de hormatge
Per har dinnar lo mainatge!
(- Manca pas qu’un pinton de vin, i fa lo Josèp, per noirir un nenet, paura femna! E coma fasiá mina de se rebecar, lo det sus la boca:)
Chut, chut chut, chut...(3)

Non, lo monde son pas rasonables. E encara, sabiá pas, lo Josèp, que lo desfilat fasiá pas que començar e que seriá pièger quand arribarián los Reis Magues.

1. Cantem Nadal!
2. Nadal tindaire.
3. Chut, chut!

tornar a la lista retour