En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2023
Annada 2022
Annada 2021
Annada 2020
Annada 2019

Audio


Cossi legir l'occitan?
Comment lire l'occitan ?

A l'attention de ceux qui auraient envie d'apprendre a lire l'occitan correctement, je conseille de suivre la petite méthode d'Andrieu Lagarde que vous trouverez ici : http://lo-luquet-occitan.fr/?legir



La nuèit de totsants

Un còp èra la nuèit de Totsants la de totes los maleficis, e la paur, la granda Paur clavelava lo monde dins los ostalses. 

Los mòrts, que se’n venián reglar los comptes ambe los vius, las armas en pena, los damnats que se purgavan los pecats, mas tanben lo diable que per aquela nuèit de l’annada se tornava trapar lo poder de far patir los èssers umans, totas aquelas creaturas maleficas èran mèstras de la nuèit, prèstas a s’acarnassir sus òmes e bèstias.

Uèi, qu’avèm perdut las nòstras vièlhas cresenças, que las grandas paurs d’un còp èra son remplaçadas per la paur de pas poder acabar lo mes, d’èsser rostits pel cambiament climatic, que la nòstra imaginacion polsiva se noirís de falses mites prefabricats delà la Mar Granda, nos convidan al contrari a sortir de l’ostal per viure una nuèit de Totsants excepcionala faita del plaser de tornar trapar las grandas paurs de las vièlhas legendas.

Vos prepausan un pauc pertot seradas cabaret, repaisses dançarèls infernals ; vos ofrisson dins de castelets una nuèit en companhiá de zòmbies, faitilhièras, mòrts-vius, mòrts-peletas, vampirs, per deslargar la vòstra part malefica e escura, o, dins un pargue una immersion a la mòde d’un film d’orror : sètz a campar, mas la serada deven una cacha-vièlha, creaturas vos assegutan, vos amenaçan ; pertot avètz a disposicion mascaraires per cambiar la vòstra cara en una plaga sanguinosa e vos vestir de pelhas del delà.

Çaquelà existís un mejan de conéisser l’estrementida de l’espaventa sens aver a recorrir a’n aqueles servicis costoses. Vos sufís per aquò, vestit de jaune, de negre, d’una blòda blanca, d’un unifòrme blu e roge, o tot simplament en bramant e en brandissent pancartas reivindicativas, d’anar al mièg de las carrièras per viure a gratis tot l’esglàs d’una nuèit de Totsants.

tornar a la lista retour