En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2020
Annada 2019

Audio


Cossi legir l'occitan?
Comment lire l'occitan ?

Èssers umans o bèstias

La setmana passada, Caròla Racketi, capitani del Sea watch 3, arrestada per aver acostat de fòrça a Lampeduza ambe 41 migrants a bòrd, acusada d’acte de piratariá, crimi de guèrra, prejudici a la securitat, foguèt fins finala aquitada ; lo decret sus la securitat s’aplica pas a las accions de salvament çò diguèt la jutja encargada de l’afar. Lo Dreit Internacional Umanitari, lo principi universal d’umanitat, avián ganhat sul dreit nacional italian.

Aquò rassegurèt lo Guston que dempuèi qualques temps se pausava questions. Aviá aprés a l’escòla que caliá portar ajuda als que patissián, qu’èran malauts, nafrats, e sustot en dangièr de mòrt, e qu’aquò èra onorar la « frairetat » de la nòstra devisa republicana. Li avián dit la meteissa causa al catequisme que de l’amor del propdan, de l’autre, lo nòstre fraire, n’avián la boca plena.

Mai tard aprenguèt que en mai de renegar las valors umanistas al còr de la nòstra identitat, coma remenan los politics, de pas portar secors a una persona en dangièr èra un delicte pasible de cinc ans de preson e 7500 € d’emenda. Mas l’actualitat li aprenguèt que ciutadans èran meses en examèn e condemnats per actes de solidaritat a de migrants, a Calais o dins la val de la Ròia.

E se demandava, lo Guston que caliá far se per exemple vesiam qualqu’un se negar. Li portar secors segond los principes sacrats e lo còde penal ? Òc ben, mas s’èra un migrant ? Li demandar de presentar los papièrs abans de l’ajudar ? E se n’aviá pas ? Lo daissar se negar ? Seriá considerar alavetz que los qu’an pas de papièrs, qu’ensajan de dintrar en Euròpa a l’amagat son pas d’èssers umans, coma un còp èra, del temps de l’esclavitud, quand disián que los Negres èran pas d’òmes perque èran tròp negres per aver una arma.

tornar a la lista retour