las annadas de publicacion seguissonlo ritme escolari de setembre a setembre Annada 2023Annada 2022Annada 2021Annada 2020Annada 2019
Cossi legir l'occitan?
Comment lire l'occitan ?
A l'attention de ceux qui auraient envie d'apprendre a lire l'occitan correctement, je conseille de suivre la petite méthode d'Andrieu Lagarde que vous trouverez ici : http://lo-luquet-occitan.fr/?legir
Lo Guston èra a dejunar quand la canha se botèt a jaupar. Sortiguèt e te vegèt al mièg del camin que li travèrsa la cort de la bòrda un camion cargat de sable, de grava, de blòcs, de ciment e d’una carriòla.
Coma esperava pas cap de peirièr, çò diguèt que deviá se’n anar en çò d’un vesin, que trantalhava o que benlèu s’èra perdut.
Totjorn prèst a rendre servici, endevenable e cortés, fa lo torn del camion e se sarra de la cabina, lo riset a las pòtas e los dets levats que soslèvan lo bòrd de la berreta.
Dins la cabina lo menaire èra a telefonar. Getèt al Guston una lucada enfuriada, las ussas regussadas, que lo riblèt sus plaça, e lo telefonet totjorn pegat a l’aurelha, sens lo mendre signe, avièt lo camion que s’alunhèt al pas.
Mentre que lo Guston demorava al mièg de la cort, boca badanta, arribèt de pels camps un canh que segurament s’èra escapat. Tanlèu que lo vegèt, la canha li faguèt qualques jaupets per li dire qu’èra en çò siu, benlèu per li desirar la benvenguda, e las doas bèstias, bolegant la coeta de contentament, virolejèron l’una a l’entorn de l’autra en se somiant l’identitat.
- Tè, çò diguèt lo Guston, dins lo nòstre monde novèl, las bèstias contunhan de se saludar coma dins l’ancian !
Lo canh rebalaire se’n anguèt e lo Guston e la canha dintrèron acabar de dejunar.>