En Òc sioplèt!



audio prochainement disponible

Cossi legir l'occitan?
Comment lire l'occitan ?

Copadura electronica

Quand aprèp una formacion aviada d’un parelh d’oras lo Guston se trapèt tot solet davant l’ordinator que l’i venián d’ofrir, se sentiguèt coma una pola qu’a trapat una cotèla.

Ausissiá ben las incitacions per pas dire las amenaças, per remplaçar lo papièr pel numeric,

- Çaquelà, çò disiá, gausaràn pas daissar de caire tota aquela populacion ante-numerica !

Mas quand se crompèt una veitura de la vièlha immatriculacion e que lo portanèl de la prefectura barrat, la sola solucion per aver la carta grisa èra de passar per internèt, quand lo servici del chèc-emplec, lo servici de la viticultura suprimiguèron las declaracions-papièr, s’avisèt qu’avián gausat e que l’avián escampat del monde d’uèi, e qu’èra vengut un andicapat dependent.

Un jorn, sul comptador del burèu de tabat, vegèt cartas de visita d’un entrepreneire que prepausava los sius servicis per obtenir una carta grisa. Plan segur, aquel servici lo caliá pagar. Un autre jorn dintrèt dins una botica informatica de la vilòta vesina : prepausavan una iniciacion a l’informatica pel monde coma el, plan segur corses que caliá pagar.

- E se lo monde se pòdon pas pagar aqueles servicis ? se demandava lo Guston.

Aprenguèt que dins un vilatge vesin una associacion ajudada per las collectivitats prepausava corses balhats per de benevòls ; l’associacion assegurava tanben una assisténcia a las personas que trabucavan en utilizar l’ordinator.

Per redusir la copadura numerica qu’èra venguda la sansonha de totes los mediàs èra aquí una practica que cali generalizar, mas lo Guston somiava que lo sol benevolat sufisiá pas, que las collectivitats devián préner las siás responsabilitats, per daissar pas digús a broa del camin e aital onorar la nòstra devisa republicana, malgrat las politicas d’estalvis e de reduccion dels servicis publics.

tornar a la lista retour