Contraròtles robotizats

A qualques oras del ressopet, lo Guston, ambe lo vesin qu’èra vengut lo quèrre per marcar lo còp, se presentèt a l’intrada del festenal de las lantèrnas chinesas. Colhonavan pas ambe lo contraròtles: bilhetas, plan segur, furga, e sustot «cuèr còde». Lo Guston èra suau : fasiá tres jorns li avián fait la tresena injeccion e aviá dins la pòcha lo novèl «cuèr còde», a la plaça de l’ancian qu’aviá escampat..

Lo Guston lo presentèt, mas res, l’aparelh del contrarotlaire demorèt mut.
- A nani, çò diguèt, es pas validat.
- Mas ai fait lo rampèl fa tres jorns !
- Òc-ben, mas lo vos caliá validar !
- Mas me l’an fait a la farmàcia, coma soi pas aluserpit ambe l’informatica lor ac aviái demandat.
- Benlèu, mas jo, lo «cuèr còde» es pas valide, vos pòdi pas daissar dintrar.
- Mas gaitatz, i tornèt lo Guston en virant la fuèlha, aquí avètz lo certificat de vaccinacion, ambe la data, lo 21.12.21, sabètz pas legir ?
- Las consignas son claras : lo vòstre «cuèr», «l’aplicacion» lo reconeis pas, vos pòdi pas daissar dintrar ! E lor virèt l’esquina.
- E ben pauròt, nos demòra pas qu’a nos en tornar ! concluguèt lo vesin ambe un renèc.
- A, s’aviái sabut, romiava lo Guston, auriái pas escampat l’ancian !

Mentre que discutissián, l’atestacion encara pels dets, los contrarotlaires d’una autra cordelada se sarrèron.
- Qué vos arriba ?

Contrarotlèron un còp de mai lo «cuèr còde».
- Es vertat, çò diguèron, es pas validat.
- Mas gaitatz, aquí, i tornèt lo Guston en virant la fuèlha, i a lo certificat de vaccinacion, la data e tot !
- Òc, es vertat. Anem, sètz en règla, podètz dintrar.
- Tanplan, se remenava lo Guston, aqueles contraròtles numerics, valon pas los dels umans. Los umans, a la diferéncia dels robòts sabon legir e sustot préner una decision d’aprèp çò qu’an legit.

tornar a la lista