Audimat e natalitat

Los estatisticians se son avisats que lo 23 de setembre las naissenças enregistran un pic de 5%, lo mai fòrt de l’annada. Se son avisats tanben que lo 23 de setembre aquò’s dus cent seissanta cinc jorns aprèp la sant Silvèstre, la durada d’una gestacion, e an avançat l’ipotèsi que las fèstas de fin d’annada, lo ressopet del 31 de decembre ne serián responsables. L’embriaguesa del vin e l’euforia de la fèsta entrainan una pèrda de vigilància, l’oblit de la pilula o la pilula presa negada dins l’alcoòl e la manjalha, es vomida dins las oras que seguisson.

Mai d’un país se mainèron de far baissar o aumentar lo taus de natalitat. Ièr, la China, causiguèt lo metòde autoritari en aclapant de penas pesugas los cobles qu’avián mai d’un mainatge ; Uèi la Ongria, que lo siu pensament es d’aver lo taus de natalitat lo mai bais d’Euròpa a causit la carròta en plaça del baston : l’estat consent a un manlèu de trenta un mila cinc cents euròs a una femna de mens de quaranta ans que se marida pel primièr còp. A la naissença del primièr nenet lo manlèu es suspendut per tres ans, tres ans de mai a la del segond, ambe l’esfaçament del tres del capital e a la del tresen tot es escafat.

En França, lo taus de feconditat en baissa dempuèi 2015, ara de 1,88 mainatge per femna, permet pas pus lo renovèlament de las generacions. Se voliam aver una politica natalista poiriam multiplicar las fèstas e los sius ressopets, lo de la sant silvèstre arribant pas qu’un còp cada an, ambe çaquelà lo risque de far pujar l’alcoolisme.

Poiriam tanben encoratjar los cobles a passar mai de temps jos la plumassièra en difusant a la television de serias pietadosas o d’emissions de tele-realitat que vos tiran l’enveja de las gaitar.

tornar a la lista