En Òc sioplèt!



Année

las annadas de publicacion seguisson
lo ritme escolari de setembre a setembre
Annada 2020
Annada 2019

Audio


Cossi legir l'occitan?
Comment lire l'occitan ?

L'apprendissatge de la natacion

A la velha de las primièras grandas partenças en vacanças d’estiu e a l’arribada de las primièras calorassas, rampelèron que l’aprendissatge de la nada èra una prioritat nacionala, e qu’aquel aprendissatge èra una responsa als enjòcs de l’educacion a la securitat.

Aquel aprendissatge se deu far lo mai lèu possible per èsser mai eficaç, e encara uèi tròp de monde arriban a l’atge adulte sens saber nadar e la situacion dins l’estat francés a de que se carcanhar. Las chifras ne son aclapairas : en 2018, tres cent trenta dus mainatges de mens de sièis ans se son negats; sus mila dus cents negadas - que cinc cents foguèron mortalas - setanta uèit del cent de las victimas avián mai de vint e cinc ans ; a la dintrada al collègi, cinquanta del cent dels escolans del campèstre e detz del cent de la vila sabon pas nadar.

Uèi, aprèp lo drama de la fèsta de la musica a Nantas, sèm a ne cercar los responsables e a nos demandar quand qualqu’un tomba a l’aiga e se nèga s’es de la fauta dels que l’aurián forçat a recuolar o que l’aurián butat, o puslèu, coma d’unes mormolhan, dels qu’an pas botat en plaça barraduras de securitat, o dels qu’an balhat l’autorizacion d’un acamp a broa de l’aiga, o se la victima qu’a mal evaluat los risques es la sola responsabla del siu malastre : quand òm sap pas nadar cal èsser innocent d’anar festejar la musica a broa d’un flume !

Aital, se las enquistas establissián que las fòrças de l’òrdre an forçat la victima a recuolar o l’an butada, la siá responsabilitat seriá a discutir : es pas de la siá fauta se entremièg los jovents butassats d’unes sabián pas nadar, e los vertadièrs responsables serián pas los de la plaça Beauvau mas los de la carrièra de Grenelle qu’an pas complit la siá mission educativa

tornar a la lista retour