Se plan causir los godilhòts

Dempuèi qu’un industrial, Alexis Godillot, equipèt l’armada de Napoleon III qualificada de «pès descaus», las sabatas venguèron los «Godilhòts», sabatassas mancant benlèu de finesa e d’elegància, mas eficaças per las longas caminadas malaisidas.

Uèi, plan segur, pel que vòl entreprene una longa caminada, lo mai important de l’equipament son las sabatas. Las li cal causir menimosament, encara mai s’a pas los mejans de se las far confeccionar sus mesura. Caldrà en primièr que sián a sa puntura ; la qu’es escricha sus la semèla e sus l’estrop es a verificar, que d’unas cauçan grand e d’autres estrech. Caldrà que lo cuèr ne siá sople, plegadís, qu’entemene pas la pèl, ni que l’escalfe e entraine bofiòlas e pelats. La semèla deurà èsser plan estudiada, escalprada de crampons, que lo pè tene plan al sòl, per s’estalviar de lisar, de patinar e de quitar lo camin. Semèlas e dessús deuràn èsser plan cordurats e pegats, que la sabata s’espanse pas a la mitat del camin. E plan segur, aprèp las aver plan espepissadas, li ne caldrà ensajar mai d’una per al cap poder trapar calçaduras a son pè.

Aital, quitament se dins la tradicion de la Vena Republica èra lo Primièr Ministre, cap de la majoritat presidenciala, qu’èra encargat de causir los godilhòts que lo President poiriá cauçar se los electors n’èran d’accòrdi, lo nòstre, elegit de fresc s’estima melhor se los causir el meteis, en ne prepausant benlèu qualques novèls, mas tanben d’autres qu’a ja portats, o que d’autres an portats : es pas prudent de partir per una longa caminada ambe godilhòts flame nòus, que mancan de soplesa e que son pas estats trabalhats e esprovats sus camins malaisits.

Çaquelà, se los electors apròvan pas la causida, lo President serà forçat de se desplaçar en claudiquejant.

tornar a la lista