En Òc sioplèt!





tornar als archius

Actualitat d'estiu

D’unes pensan qu’al mes d’agost, res pus se passa pas e qu’es pas la pena de seguir l’actualitat. L’Executiu, lo Parlament, los Magistrats son en vacanças, l’Oposicion es muda, los afars acosomits : res, se passa pas pus res e los jornalistas que devon charrar pendent una mièjorada son a se demandar çò que van contar, e per ganhar de temps, passan musica, o rampèlan l’actualitat d’un còp èra.

Çaquelà, per abituda, aital, lo matin en dejunant, contunhi d’escotar la ràdio. Òm sap pas… Benlèu que sièr, s’es passat quicòm : un dròne qu’auriá fotografiat lo cople presidencial en malhòt de banh o tot nud, una pichòta frasòta qu’auriá escapada a qualqu’un…

Aquel matin parlavan de la calorassa que durava jà dempuèi un momenton. Semblava que tot foguèsse jà dit : los vièlhs desidratats, las bèstias sens pastura, lo milh cramat… totes los conselhs balhats : las dochas, los litres d’aiga a beure, la frescor a cercar, s’estalviar los esfòrces a la raja del solelh…

E ben non, tot èra pas estat dit ; aquel matin i tornavan : parlavan de la « clim » per ne mostrar los desplasers e los dangièrs.

- Tè, me diguèri, sièr disián que fasiá necèra dins los ostals de retirada…

« Reportatge de …. » ausiguèri.

- A, me diguèri, quitament s’èra dins un vilatge o una vilòta que jamai n’aviái pas entendut parlar, per qu’i manden un jornalista, s’i es passat quicòm que val lo còp. As plan fait d’alucar lo pòste !

E escotèri l’entrevista d’una femnòta qu’aviá botada la « clim » tròp fòrta, qu’estornudava, qu’aviá mal a la garganta, un bocinèl de fèbre e qu’èra estada obligada de prene paracetamòl …

Valiá lo còp de senhalar l’eveniment a l’antena a una ora de granda escota...

Urosament que tanlèu la calorassa acabada i aguèt la DINTRADA e dus ministres que causiguèron de sortir en plaça de dintrar.